Bloque por Asturies refuga la instalación d’un avión de combate nuna glorieta de La Felguera

El Bloque por Asturies del Nalón refuga la instalación d’un avión de combate Mirage F-1 nuna de les glorietes de La Felguera. La formación nun entiende «qu’un Conceyu como’l de Llangréu, onde la xente nunca dudó en posicionase contra aventures belicistes, vaya agora a colocar un avión militar nun espaciu públicu del conceyu, estableciendo a bon seguru un elementu de discordia».

Pal Bloque, la so colocación supondría traicionar «a tolos llangreanos comprometíos col exerciciu de la non violencia y a tola ciudadanía que pretende educar a los sos fíos en valores pa la paz». «De facese, taríamos énte un Partíu Socialista, el de Llangréu, entregáu en brazos d’aquéllos que defenden l’armamentismu y los valores negativos que lu acompañen», destacaron.

La formación política manifestó que si se quier facer dalgún homenaxe a l’aviación podría colocase ún civil, ensin mancar sensibilidaes, reconociendo d’esta manera la enorme contribución de l’aviación civil al desarrollu humanu.

Amás, añadió que nun dexa de resultar curioso que mentes se pretende instalar esti monumentu a la destrucción, que ye un caza de guerra y que nun tien vinculación dalguna con Llangréu, «tea podreciendo maquinaria abondo, tanto minera como sidero-metalúrxica», que bien diba poder ponese nesi sitiu.

Comentario Cerrado