Pesca prinda más de 2.000 quilos de xarda n’El Musel

La descarga d’un arrastreru gallegu frayó la prohibición de pescar esta especie n’España enanties del 15 febreru. Noticia de El Comercio

18.01.11 – 03:07 – Y. C. | XIXÓN.

Los servicios de vixilancia pesquera del Gobiernu rexonal prindaron el pasáu vienres más de dos tonelaes de xarda pescada irregularmente, según pudo saber EL COMERCIU. El pexe taba siendo descargáu n’El Musel dende un barcu d’arrastre gallegu y taben apurriéndolo a un camión cuando la inspección interceptó la carga y decidió el prinde.

La irregularidá que fizo la denuncia nun se refier nesta ocasión al arte de captura nin a dir pasaos de quilos, sinón a la circunstancia de que la pesca de xarda ta prohibida pa la flota española hasta’l próximu 15 de febreru. Anguañu ye’l primer añu qu’asocede asina, pero esclaria la campaña’l 2010, cuando l’arrastre escosó prácticamente tol cupu asignáu a España primero qu’otres artes aportaran a la pesquería. Esto aconseyó a les autoridaes pesqueres non yá llindar les descargues selmanales, sinón tamién retrasar l’aniciu de la campaña.

En 2010, la flota con llicencia p’afaenar na cala Cantábrica y Noroeste pudo dedicase a la xarda namás empecipiar l’añu, mentantu que en 2011, como queda dichu, esiste una veda hasta’l día 15 de febreru. Portugal, sicasí, nun aplica la mesma restricción, de forma que la so flota yá tien abiertu la cala y, ensin perxuiciu de que tamién puedan llegar al mercáu importaciones d’otros países, non tola xarda que pueda ponese a la vienta estos díes vien de pesca illegal.

Exemplarizante
El prindo de les 157 caxes de xarda nel puertu xixonés resulta, sía que non, exemplarizante, pa nun dar atayu a armadores qu’opten por saltar se les normes. L’arrastre ye l’arte de pesca llegal menos selectivu, de forma que ye posible efectuar captures indeseadas, yá sía por tratase d’especies en víes d’estinción o delles protexíes por una veda temporal, como ye anguaño’l casu de la xarda.

Anque la mayoría del conteníu d’una rede d’arrastre llega ensin vida al barcu, ye obligación de los pescadores tornar a la mar les especies que nun ta dexáu comercializar, cosa qu’aparentemente nun asocedió nel casu del pasáu vienres. Otra miente ye si cabe la posibilidá de llevantar más de dos tonelaes de xarda de forma accidental, colo que la irregularidá consistiría en llevalos a tierra, o si tal cantidá implica que’l pexe prindáu yera un oxetivu antemanáu.

Comentario Cerrado