Laura González asegura que la térmica de Trubia beneficia namái a los grandes intereses económicos

Pa Izquierda Xunida-Bloque por Asturies-Los Verdes la central térmica de gas de ciclu combináu (CTCC) de Trubia ye rechazable por completu pues nun tien xustificación dalguna, ya qu’Asturies ye altamente escedentaria en enerxía elléctrica. Según la candidata d’IX-BA-Verdes “Asturies carez d’una estratexa enerxética ya’l Gobiernu carez d’interés nel so diseñu, tando la so actuación sometía a los deseos de les empreses del sector. El Gobiernu del Principáu apostó por un modelu de concentración de la producción enerxética n’Asturies pa la so esportación, que perxudica gravemente la salú de los ciudadanos, la economía d’otros sectores (turismu, agricultura, ganadería, pesca…) ya’l mediu ambiente en xeneral.”

Per otra parte, Asturies ye la que mayor cantidá de CO2 emite por habitante y ya dispón de cuatro grandes centrales térmiques, cuya duplicación ta prevista o en marcha; en concretu ta levantándose ya una central de gas mui cercana a Trubia en Sotu Ribera, xunto a la esistente de carbón. La situación atmosférica de la fastera central, onde se concentra la población, ye mala, superando habitualmente los llímites recomendaos de contaminantes.

Pa la candidata d’IX-BA-Verdes “la llocalidá ovetense de Trubia padez unos niveles de contaminación y niebles asociaes a la miema insufribles, por mor de la presencia d’una importante área industrial, na que tan ubicaes Industrias Doy, Industrial Química del Nalón o la Fábrica d’Armes. El mal olor y les niebles sucias son habituales na comarca. Los vecinos nun puen soportar más presión contaminante.”

Dende’l Congresu y dende la Xunta Xeneral del Principáu d’Asturies vamos facer toles actuaciones al nuesu alcance pa contribuir a bloquear la instalación de la térmica”, finó Laura González, que calificó la actitú del Principáu y del Ayuntamientu como de “falsamente neutral”. “L’ausencia d’un posicionamientu claru contrariu favorez los intereses empresariales. Nel casu del PP ye esperable, nel casu de las autoridaes ambientales del PSOE ye llamentable. Les autoridaes autonómiques y llocales saben qu’una vuelata que se camude’l Plan Urbanu la instalación de la térmica ye mui difícil de parar. Ellos, como competentes en materia urbanística a distintu nivel, tienen la llave pa protexer Trubia”, dixo la candidata al congresu d’IX-BA-Verdes.

Comentario Cerrado